Блэгъожъ Зулкъарин

Блэгъожъ Зулкъарин – Адыгэ къэралыгъо университетым ипрофессор, бзитIушIэныгъэмкIэ илабораторие ипащ.

Ар бзэм Iоф зыдишIэрэр илъэс 50-м ехъугъ. Краснодар дэт къэралыгъо кIэлэегъэджэ институтыр къызеухым урысыбзэмрэ адыгабзэмрэкIэ ригъэджагъэх. ЕтIанэ къалэу Горькэм (Нижний Новгород) дэт университетым филологие шIэныгъэхэмкIэ кандидатскэ диссертациер къыщигъэшъыпкъэжьыгъ. Джы Зулкъаринэ Адыгэ къэралыгъо университетым щэлажьэ, доктор, профессор, бзитIушIэныгъэм (двуязычием) Iоф дешIэ. IофшIагъэхэр иIэх еджакIохэм яжабзэ икультурэ къызэрэпIэтыщтым фэгъэхьыгъэхэу: «Типы ошибок в русской речи учащихся-адыгейцев и их источники», «Контактирование русского и родного языков в условиях двуязычия» ыкIи нэмыкIхэр. Урысыбзэм, адыгабзэм яхьылIагъэу статья 250-м ехъу къыхиутыгъ, тхылъ шъхьафэу 30-м ехъу ытхыгъ. Ахэм ащыщых адыгэ-урыс гущыIалъэхэр, урыс-адыгэ зэдэгущыIалъэхэр, адыгэ лъэкъуацIэхэмрэ цIэхэмрэ, адыгэ гущыIэжъхэр урысыбзэкIэ зэдзэкIыгъэхэу. Блэгъожъ Зулкъаринэ Адыгэ дунэе академием иакадемик, Урысыем педагогическэ ыкIи социальнэ наукэхэмкIэ иакадемие иакадемик, Зэкъошныгъэм иорден къыфагъэшъошагъ.