МэщбэшӀэ Исхьакъ
МэщбэшӀэ Исхьакъ — адыгэ тхэкӀо цӀэрыӀу. Ащ тхылъыбэ ытхыгъ. Жабзэм (литэратурэм) Ӏахьышхо хэзылъхьэгъэ тхьакӀу. Ащ хэгъэгу щытхъуцӀэхэр къыфаусыгъэх, тынышхохэр къыфагъэшъошагъэх. Исхьакъ итхылъмэ ащыщхэр тихэгъэгу имызакъоу ӀэкӀыб къэралхэми ащашӀэх.
МэщбэшӀэ Исхьакъ адыгэхэр инэу рэгушхо. Адыгэ Республикэм и Гимн хэлъ гущыӀэхэр ащ ытхыгъ.
МэщбэшӀэ Исхьакъ Шумафэ ыкъор 1931-рэ илъэсым жъоныгъуакӀэм (маим) и 28-м Краснодар краим хэхьэрэ Уруп районым ит адыгэ къуаджэу Шъхьащэфыжь къыщыхъугъ. 1947-рэ илъэсым якъоджэ еджапӀэр, 1951-рэ илъэсым Адыгэ педучилищыр къыухыгъэх.[1] Илъэс 15-м щегъэжьагъэу усэхэр зэхилъхьэщтыгъэх. Иусэхэр зыдэт иапэрэ тхылъэу «ЦӀыф лъэшхэр» 1953-рэ илъэсым къыдэкӀыгъ. МэщбашӀэм зэкӀэмкӀи тхылъ 70-м ехъу ытхыгъ. Мы аужырэ илъэсхэм тарихъ романхэр етхых. МэщбэшӀэ Исхьакъ итхылъыбэ урысыбзэкӀэ зэдзэкӀыгъэхэу Москва, Краснодар, Мыекъуапэ къащыдэкӀыгъэх. Ащ итхылъхэм ащыщхэр ӀэкӀыб хэгъэгухэми ащызэрадзэкӀыгъэх. Тарихъ романхэу «Бзыикъо зау», «Мыжъошъхьал» зыфиӀохэрэр тыркубзэкӀэ, арапыбзэкӀэ къыхаутыгъэх. МэщбэшӀэ Исхьакъ иӀофшӀагъэхэм осэшхо къафашӀыгъ. Ар Адыгэ, Къэбэртэе-Бэлъкъар, Къэрэщэе-Щэрджэс республикэхэм я Народнэ тхакӀу. Ащ нэмыкӀ шӀухьафтын инхэри иӀэх.
- ↑ АДЫГЭ ЛИТЕРАТУР я 11-р э класс Мамый Руслъан, ХьакӀэмыз Мир, Хьамырзэкъо Нуриет, Шъхьэлэхъо Дарико, ХъокӀо Светлан, Шэуджэн Тэмар 2014